'n Navorser het by geleentheid 'n studie gedoen om vas te stel dat as daar net een vraag is wat mense vir God sou kon vra, wat sou dit wees. Die standaard een was: "Hoekom is daar soveel swaarkry in die wêreld?" Onlangs het ek hieroor gepreek. Toe stuur Neels Jackson, wat tydens daardie diens in die kerk was, die volgende gedig vir my aan wat hy gaan skryf het. Dit het my so aangegryp dat ek dit vandag in die Goeie Nuus insluit:
Die Vraag
Die navorser het die net wyd gegooi:
oor rasse en klasse, geslagte én geslagte.
Van die stedelike toringblokke af tot
waar 'n eensame rokie bo 'n afgeleë huis
hemel toe reik, wou hy weet:
As julle Hom een vraag kon vra...
Later het hy by sy tafel gesit, deur duisend
papiere gewerk, response gerekenariseer,
georden, geanaliseer. En uit dit alles
het oorweldigend, één vraag gekristalliseer:
Hoekom is die aarde so vol pyn en leed?
Die Vader het oor sy skouer geloer,
gesug: "Dis wat ek van julle wou weet..."
